sàbatu 22 aostu 2020
Massimu Susini mori assassinatu u 12 sittembri 2019.
A mani di u 12 sittembri scadutu, Massimu, andendu ad apra u so stabilimentu in Carghjesi, hè tombu à tradimentu.
Ci hè un tistimoniu di viduta chì era sopr’à locu quandu Massimu hè statu uccisu, è chì hà avvisatu sùbitu i ciandarmi chì ùn ani micca postu travati da intuppà l’assassini chì si ni sò andati com’è chì nienti fussi.
Massimu Susini hè statu assassinatu par vìa chì s’uppunìa in parsona è in paroli à una banda di maiali è à u so capu indiati à metta à Carghjesi à l’abbottu.
U 5 uttrovi 2019, in piazza pùblica di Carghjesi, s’hè creatu u Cullittivu antimafia « Massimu Susini ». Ed era di règula divuta, chì Massimu a sapìa ch’eddu affruntava a mafia.
Pà a prima volta, un associu dicidi in i so statuti di custituissi partita civili in i pruciduri incausendu pràtichi criminali chì voni cuntrullà attività ecunòmichi è finanziarii, furà u dinaru pùblicu, assassinà o pruvà d’assassinà in leia cù sti pràtichi di u crìminu urganizzatu. Dunqua di fà ricunnoscia u “dilittu d’associu di malfattori cù u scopu di custituì un’impresa mafiosa”.
Da dopu ùn emu più mintuvatu à Massimu, lachendu chì l’istituzioni ghjudiziaria cù a so pulizza fessi l’inchiesta, ma òndici mesi dopu à l’assassiniu di Massimu, ùn si sà nudda. Avemu intarpillatu publicamenti l’auturità statali : prifetta, pracuratori ginirali di a Corti d’Appellu, l’eletti di l’Assemblea di Corsica è di u Cunsigliu Esecutivu. N’appillemu à u pòpulu, à i media.
Di mafia nimu ni vulìa senta nomu. U fattu stà chì à Massimu l’hà tombu a mafia. Chì u voli canciddà puru avà ch’eddu hè mortu. U so visu hè imbaddinatu, dopu à u so nomu ‘Massimu sempre vivu” ani scrittu “mortu”. Tumballu una volta ùn li basta. U voni canciddà. A d’ani pruvata di brusgià u so stabilimentu chì era u so stantapani.
Semu in Corsica. Pà a mafia, pà i pìcculi mafiosi, Massimu hè oramai più priculosu mortu và vivu. Ci sò chì ùn ani accittatu a parola mafia. È avà si parla di vindetta. Par appuntu semu in Corsica. Ùn si tratta di una famiglia opposta à una famiglia. Hè una banda di criminali mafiosi chì tolsi a vita à Massimu.
Vurrìstini ch’edda fussi una lita trà dui famigli. Ma ùn pò essa è ùn hè micca. Ùn sò micca cumunicati di stampa, in tèrmini sbagliati o vulintarosi, chì farani chì un’impresa criminali mafiosa fussi qualificata di vindetta.
Ùn ci hè nimu à vindicà. Ciò chì abbisogna hè a ghjustizia, dunqua a virità. Cusì i patti sò chjari è lindi. Dicìani in i tempi “u Corsu ama a ghjustizia”. Massimu a ghjustizia l’amava. Noialtri a ghjustizia l’amemu. Ciò chè no dumandemu pà Massimu hè a ghjustizia. Ed hè di règula. Hè corsu u so sangui. U so sangui briona à l’arechji di tutti : steti cù mecu, alzeti u capu.
Tògliali a cuscenza à Massimu, v’eccu ciò chì u gruppu mafiosu in Carghjesi vulìa fà. Or nimu piglia a cuscenza di nimu. Chì ci semu noi. È noi a sapemu. Semu vardinchi. Masssimu hè quì. Massimu hè vivu. Massimu hè sempri vivu.
A mafia voli impona u so tarrori in Corsica sana. Ma ùn timimu nisuna minaccia è à nimu minaccemu nè oghji nè dumani. U sacrifiziu di Massimu hè u so onori. Chè no li fùssimu o nò apparintatu, Massimu ci hà datu tuttu quantu d’eddu. Comu mai pudarìstimi scurdacci d’un donu cumpagnu ! Mancu pinsalla ! Era vardincu d’issa tarra di Corsica, di a so lingua, di a so storia, di a so ghjenti. L’ani toltu u so fiatu ma ùn l’ani toltu u so pinsamentu, nè i so idei, chì viàghjani da una parsona à l’altra.
Morti ci n’hè statu è ci n’hè. I mafiosi, i capi è i taccheri chjuchi è maiò, gòdini soldi è benistà. Stani in i so beddi casi, campendu à solda arrrubati è paghendu pìcculi assassini chì bràmani d’alzassi à u cumandu. Viàghjani in vitturoni blindati avvinti di porchi à u so cumandu.
Vulemu essa in una sucietà civilizzata. Par ciò bisogna chì l’attività criminali fùssini scantati. Ed hè nicissaria :
1) d’intruducia in a leghji u crìminu “d’associu mafiosu”
2) di toglia i pussessi d’ogni parsona cundannata par vìa di a so appartinenza à un associu mafiosu
3) d’allargà è rinfurzà u statutu di cuperatori di ghjustizia di modu à indibulì u crìminu urganizzatu è dà à i criminali a pussibilità d’amindassi.
V’èccula a nostra a “vindetta”, quidda propiu chè no vulemu. Ed hè a “vindetta” a più timuta da i criminali mafiosi.
U locu teni menti i vistighi di l’assassiniu di Massimu. D’eddu nienti mori, tuttu hè prisenti è vivu. Hè a putenza di a mimoria antica, a mimoria di u nostru cumunu, di ciò chì hè di tutti, i morti è i vivi. I mafiosi ùn i sani micca tutti sti cosi. Ùn sani – è ùn fàcini – altru cà latrìsimu, sangui calcicatu, disonori, vituperiu.
Ùn lacaremu micca chì a Corsica divintessi un purcili. Ùn lacaremu micca chì a Corsica divintessi una mafia. Ùn lacaremu micca chì a Corsica divintessi una barbarìa. Semu ribraduti è dicisi. A nostra cultura, spichju di u nostru cumunu, hè u nostru sguardu da sceglia, à mezu à a bughjura, a strada di a vita, propiu a strada di Massimu. Avà. Insemu.
L’impegnu degnu di Massimu hè u nostru. Ùn ghjastimemu à nimu, ùn inghjuliemu à nimu, ùn rimbicchemu à nimu. Andemu à u passu chè no avemu sceltu è tracciatu, cù l’amori di a nostra ghjenti. À chì ùn si misura ùn dura. A règula hè ghjusta ancu in casa à u rè. I valori di l’antichi valìani arimani è vàlini oghji. Sò a nostra arca di ponti, u sacraziu di i nostri maiò dundi dormi Massimu. Hè a nostra forza. È ùn ci hè tema chì ci farà vultà in daretu. Dund’è no semu, stemu. Aspittemu chì a ghjustizia fussi ghjusta, puri puri. Pà a paci chì bisognu ci hè.
Rinatu COTI